Ndege ya safari za ndani ya nchini Misri iliyokuwa ikitoka mjini Alexandria kwenda Cairo imetekwa nyara na watu wasiojulikana na kulazimishwa kutua katika uwanja wa ndege wa Larnaca nchini Cyprus.
Kwa mujibu wa redio ya taifa ya Cyprus, ndege hiyo iliyokuwa na abiria 55, imetekwa nyara mapema leo nchini Misri. Aidha mbali na abiria hao 55, ndege hiyo aina ya Airbus 320, ilikuwa na wahudumu saba. Inaelezwa kuwa, watekaji nyara hao waliiamuru ndege hiyo iliyokuwa inaelekea mjini Cairo, kubadili mwelekeo na kwenda kutua katika uwanja wa ndege wa Larnaca nchini Cyprus. Hadi sasa hakuna kundi lolote lililotangaza kuhusika na hujuma hiyo, ingawa kundi la kigaidi na kitakfiri la Daesh limenyooshewa kidole cha lawama.
Baadhi ya duru za habari nchini Cyprus zimedokeza kuwa kuna bomu kwenye ndege hiyo. Itakumbukwa kuwa, mwaka jana ndege nyingine ya Russia ilianguka katika jangwa la Sinai baada ya kutegwa bomu ndani yake. Kabla ya hapo siku chache zilizopita, watu wenye silaha walitishia kuripua ndege za Misri
.. Habari zilizotufikia hivi punde zinasema kuwa, tayari kumeundwa tume ya upatanishi kwa ajili ya kwenda kuzungumza na watekaji nyara wa ndege hiyo nchini Cyprus. Taarifa kamili kuhusiana na tukio hilo itakujieni katika matangazo yetu ya baadaye
0 comments:
Chapisha Maoni